Triplemente reprimía: asturiana, d'esquierda y muyer

http://www.fai-asturies.org/principal.php?pag=lernot&id=79

201 años dempués de la declaración de soberanía de 1808 Fai! quixo recordar esti 25 de mayu como'l día nacional d'Asturies. Pa ello, entamóse una folixa que cuntó con un recital poéticu, la ellaboración d'un mural y un conciertu con 4 grupos asturianos que punxeron la banda sonora a una xornada reivindicativa pola soberanía popular asturiana.

Más d’un cientu de persones participaron esti sábadu 23 na I Folixa Nacional entamada por Fai! como reivindicación y celebración del Día de la Nación Asturiana, recuerdu de la xornada qu’abre la historia contemporánea d’Asturies, el 25 de mayu de 1808, día de la declaración de soberanía de la Xunta Xeneral.

Doscientos ún años depués d’esti fechu y de la creación de la bandera asturiana, la organización d'esquierda soberanista Fai! quixo ufrir un menú folixeru y combativu nel marcu del CSOA La Reflexón. Abriendo les actividaes, Sergio Gutiérrez Camblor, Carlos Suari, Pablo X. Suárez, Xabel Vegas y Xandru Fernández protagonizaron el recital poéticu “Poetes agresivos (disparen les sos obres contra los que se duermen)”, onde tuvo bien presente, de la mano de los sos versos, la crítica social y la ironía más característica de cinco poetes que representaron na Folixa’l presente y el futuru de la lliteratura nacional, al tiempu que nes paredes se proyectaben imáxenes subversives qu'afalaben l'ambiente combativu del recital.

De siguío, dellos artistes plásticos emprimaben a diseñar un mural que tenía la histórica fras como protagonista: “Asturies enxamás vencida”.

Dientro del CSOA, organización, delles puestos de material y músicos ultimaben tolos detalles pa que dende les siete y media, la música entamara a sonar na I Folixa Nacional con un escenariu enllenu d'asturines y de banderes d'otros pueblos en llucha como les de los Països Catalans, Castiella, el País Llionés, Andalucía, Euskal Herria, Palestina...K-Nalón yera’l grupu encargáu de romper el silenciu col so rap dinamiteru 100% n’asturianu.

Darréu Arma X y 13 Palabras xubíen al escenariu de La Reflexón pa que la revolución de rimes nun aparara.Metanes l'actuación, una pancarta xubió al escenariu pa denunciar la illegalización de les idées y pola derogación de la llei de partíos.

Al finar esta actuación los sones reivindicativos dexaron pasu al actu políticu, onde militantes de Fai! lleeron un manifiestu en favor del 25 de mayu como día nacional d'Asturies. Enantes, un representante del Comité de Sofitu a Iniciativa Internacionalista n'Asturies, que llamentablemente foi la única organización qu'acudió a la llamada que dende Fai! se ficiere a los partíos de la izquierda nacional asturiana pa dicir unes pallabres, agradeció'l convite y presentó la campaña que ta desendolcando'l comité nesti país, a pesar de les torgues y la criminalización que careció y carez esta y otres munches opciones polítiques d'esquierda soberanista nel estáu español.

Na segunda metada del conciertu Vinagre de Sidra abría capítulu pa les guitarres y el rock, que yá na fin de la nueche diba zarrar Gomeru, depués de cinco hores de música dende la trinchera más reivindicativa del país.

Dende Fai!  nun queremos que s'escaeza la nuestra historia, la historia d'un pueblu combativu que siempre supo tar a l'altura de les circunstancies. Güei tócanos a nosotres y nosotros, les y los asturianes y asturianos del sieglu XXI siguir na llucha en busca de la soberanía popular d'Asturies.

[*+ ]

Cuatro poetes agresivos y cuatro grupos asturianos na "1ª Folixa Nacional" de Fai! esti 23 de mayu en Xixón

Testu del panfletu:

¿CRISIS COL CAPITALISMU? Nada nuevo nesti llau de la barricada

[*+ ] Anque los mass-media nos vendan, día tres día, la situación mundial anguaño como de “fonda crisis capitalista”, nós hemos de sorrayar qu’esti sistema económicu implica CRISIS pola so propia definición, crisis pa los y les de siempre: trabayadores de pueblos de tol planeta que carecen l’imperialismu y la violencia económica y militar de les grandes potencies mundiales y empreses multinacionales, que lleven sangrando a millones de persones dende hai munches décades, pa qu’equí viviéremos nun “estáu del bientar” que nun lo yera tanto.

[*+ ] Pero, n’efeuto, n’Asturies tampoco podemos dicir qu’acabáremos d’enteranos de lo qu’implica’l conceptu de CRISIS: tres les mentires de los sindicatos del réxime, col esfarrape dafechu de los fondos europeos pa la reconversión industrial, Asturies avérase a un númberu de 80 mil paraos y paraes (nuna población mui avieyada con un total d’un millón d’habitantes), onde la mayoría sigui siendo de muyeres, ensin que nengún gobiernu faiga nada.

[*+ ] ¿Por qué nun valen les probetayes midíes de los gobiernos? Ye bien cenciello: porque esti sistema nun tien igua posible. La crisis va terminase cuando desaniciemos esti modelu económicu d’inxusticia y esplotación, onde’l beneficiu ye pal que tien más y la falta de derechos y la probeza pa los y les más indefensos ya indefenses. Agora fálennos de CRISIS porque los poderosos entamen a “dexar de ganar a espuertes”, pero la hestoria demuestra que’l capitalismu sofre “crisis” cícliques que siempre terminen de la mesma manera: recortando los derechos a les y los trabayadores, socializando les deldes y privatizando los sos beneficios.

[*+ ] Dende Fai! facemos un apueste pola organización de la disidencia en toles estayes sociales: dende los y les estudiantes a les y los trabayadores d’Asturies y del mundu, pasando por tolos movimientos sociales, como manera de facer oposición al capitalismu. Afondar na solidariedá y axitación ente tolos sectores de la sociedá ye la única solución. Si toquen a ún tóquennos a toes y toos. Agora más que nunca: pola xuntura de la esquierda asturiana, pol trabayu, polos servicios sociales y contra les privatizaciones y los recortes de derechos.

EL CAPITALISMU NUN TIEN IGUA. ¡DESANICIÉMOSLU!
NON MÁS ERE’s, NON MÁS REPRESIÓN A TRABAYADORES y ESTUDIANTES

¿Qué ye Fai!...?

[*+ ]Fai! ye una organización política asturiana d'esquierda soberanista, non vinculada a  nengún partíu políticu, que tien como finxu articular, dende l'ambetu de los estremaos movimientos sociales, un frente unitariu d'aición y pensamientu na esquierda y la defensa de la soberanía popular asturiana. Surde'l 1u de mayu de 2008 como espaciu alternativu y llugar nel qu'ellaborar y treslladar un discursu concretu a la sociedá d'esti país.

[*+ ] En Fai! creemos qu'otru mundu ye posible. Defendemos una Asturies soberana nun mundu de pueblos llibres. Nós consideramos que namás sedremos verdaderamente llibres, si ponemos fin a la opresión nacional que carez Asturies, al tiempu que desaniciamos esti sistema capitalista, sangrín, que nos afuega social y nacionalmente. Nesti sen, Fai! apuesta por una esquierda soberanista, altermundialista, anticapitalista ya internacionalista, feminista, antirracista y antifascista, ecoloxista, llibre de represión a les dixebraes opciones sexuales y/o afectives y realmente democrática. En resumíes cuentes: que lluche pola consecución del socialismu n'Asturies y defenda les estremaes identidaes nacionales como rempuesta al capitalismu, qu'al traviés de la globalización, mundializa la esplotación y el beneficiu pa unos pocos, en cuenta d'esparder la riqueza, los recursos y los derechos.

¡PUXA'L PRIMERU DE MAYU!
¡PUXA LA LLUCHA DEL PUEBLU TRABAYADOR!