Triplemente reprimía: asturiana, d'esquierda y muyer

La organización solicita otra vuelta que Gotor cumpla les sos promeses electorales

Al traviés d’una enmienda presentada pol profesor Félix Fernández de Castro, la Xunta de Facultá de Filoloxía refugó la posibilidá de que l’asturianu tea ente les llingües modernes que van poder estudiase nes enseñances renovaes nesta área.

Ello, malpenes dos díes depués de qu’un representante universitariu de Fai! instare al nuevu Rector a que se pronunciare, ente otres coses, pola urxente falta de resolución del conflictu coles titulaciones de filoloxía asturiana na facultá y na escuela de Maxisteriu. La rempuesta per parte de Vicente Gotor pasó per aparcar, pel momentu, el tema de les nueves titulaciones de Filoloxía y Maxisteriu énte la reforma y adaptación al EEES (Espaciu Européu d'Educación Superior) d'estos títulos propios.

Énte estos fechos que marxinen l’asturianu dientro de los títulos proyectaos y viendo l’actuación de les persones implicaes, Fai! anuncia:

1. La so conderga total a la marxinación que pal asturianu aprobó la Xunta de Facultá de Filoloxía de la Universidá d’Uviéu, al traviés de la enmienda presentada por Fernández de Castro na qu’únicamente taba recoyida la eliminación del asturianu del plan presentáu pol Decanatu.

1. L’apoyu públicu a Ana Cano, exDecana d’esta Facultá, mesmo pola so defensa de la dignidá académica de la llingua asturiana, que pola so decisión de dimitir nel so cargu.

1. La solicitú de que Vicente Gotor aclarie si daveres conoz los procesos d’estudiu ya implantación de los nuevos planes d’estudiu tres de la so negativa a pronunciase fai malpenes dos díes.

1. La solicitú de que Vicente Gotor actúe de forma decidida nel conflictu qu’ayeri quedó más abiertu que nunca na Facultá de Filoloxía, respondiendo polos derechos y les realidaes científiques perriba de los intereses personales de los docentes qu’enxamás escondieron les sos inquietúes antiasturianes.

1. La solicitú de que Vicente Gotor, cumpla, en fin y per primer vez dende la so elección, coles sos promeses electorales.

1. La so certeza de qu’esti conflictu vien arriendes de la vulneración de los derechos llingüísticos de los asturianos y asturianes que namás tienen na OFICIALIDÁ de la llingua asturiana la so solución efectiva y real.

Poro, Fai! alquier el compromisu de siguir trabayando dende y pa la comunidá universitaria y polos derechos llingüísticos d’Asturies, y poniéndose a trabayar nesti sen en tolos calces afayadizos.

Uviéu, a 25 de xunu de 2008