Triplemente reprimía: asturiana, d'esquierda y muyer

En primer llugar, Fai! yá consideró como insuficiente, probe y indigna la propuesta de MINOR nel 'Informe Filoloxía Asturiana y Espaciu Européu d'Educación Superior' más d’un mes enantes de la votación na que salió escoyida esta opción. Los datos taben claros y fueron irrebatibles cualitativa y cuantitativamente: la solución del MINOR de 48 créitos nun yera tal, en cuantes que reducía la carga llectiva que tien anguaño’l títulu d’especialista (72 créitos), considerada per tolos axentes sociales favoratibles al asturianu como “deficiente” y perdíase la oportunidá histórica de que l’asturianu entrare, col entamu del EEES, al mesmu nivel que les demás llingües na universidá asturiana. Sigún esto: ¿va solucionar el MINOR con menos hores llectives los problemes que vienen dándose na deficiente formación del alumnáu de filoloxía asturiana?¿Quién va convencenos de les bondaes d’un MINOR que vien embaxo’l brazu con menos carga llectiva que l’actual modelu, calificáu por tola comunidá como probe y indignu? En segundu llugar, Fai! quier amosar el so disgustu por ver cómo nesta segunda votación nenguna de les opciones a votar recoyía les necesidaes reales y reivindicaciones del asturianismu cultural, siendo la llingua asturiana la única que queda escluyida de tener estudios de mayor integridá que los 48 créitos de los que consta’l MINOR. D’esta manera, a Fai! resúlta-y murnio’l ver cómo, nesti procesu, la mayoría qu’históricamente na facultá de filoloxía taba a favor de que l’asturianu tuviere al máximu nivel na universidá abandonare’l nivel de reivindicación y rebaxare les sos espectatives. Esta actitú de dellos de los sectores que se dicen “asturianistes” nel campus del Milán dexa nuna situación de probitú al idioma difícilmente esplicable, porque hipoteca’l futuru de los estudios de filoloxía asturiana y, amás, obliga moralmente a los promotores d’esti MINOR a desplicar cuáles son les razones reales poles que s’amenorguen d’esta miente los mínimos de dignidá aceptables pa xente que se diz “favoratible” a la presencia normal del asturianu na universidá.

Nesti sen, Fai! refuga cualquier muestra de triunfalismu, inesplicable dende una óptica mínimamente comprometida cola llingua, más alló de la que se pudiere dar al ver la falta d’apoyos total a la propuesta d’escluyir l’asturianu de la universidá fecha por Félix Fernández de Castro y insta al sector promotor del MINOR a reflexonar y abandonar postures posibilistes qu’espeyen incoherencies y una doble moralidá difícil de xestionar públicamente. Pa finar, Fai! insta al Rector de la Universidá d’Uviéu y al Conseyu de Gobiernu de la Universidá, próximu muérganu responsable de ratificar la decisión de la Xunta de Facultá, a dar marcha atrás y nun permitir que l’asturianu quede manifiestamente reprimíu y agraviáu frente a otres llingües, permitiendo que salga del requexu de los castigaos y entre a formar parte, con normalidá, de los estudios de la facultá de filoloxía. Nesti sen, la ironía ye cruel, y permite que llingües non oficiales n’Asturies como italianu o francés puedan ser estudiaes dignamente, mientres que la llingua d’Asturies ye claramente discriminada nuna universidá que, de quedar asina, difícilmente podrá llamáse asturiana. Ye’l tiempu, poro, de que Vicente Gotor dea validez a les promeses electorales que-y valieron l’apoyu de dellos grupos “asturianistes” poles sos postures a favor del asturianu y dexe atrás argumentos y complexos desfasaos y anticientíficos y otorgue a l’asturianu un estatus al máximu nivel, comparable al d’otros estudios, con normalidá.

Uviéu, 27 de payares de 2008