Asina Fai! quier facer un llamáu a toles persones y sectores comprometíos colos valores republicanos y de tresformación social y nacional a acudir a esta manifestación, qu'un día enantes de la entrega de los "premios", el xueves 22 d'ochobre, percorrerá les cais d'Uviéu y que tendrá salida dende la Estación del Norte a les 20 hores.

L'Asamblea Xeneral de Fai! destaca'l componente "verdaderamente unitariu de la mesma, realidá poco avezada nel entornu de la esquierda nacional asturiana" polo que considera importantísimo que tolos actores sociales y políticos que puxen por unos oxetivos bien asemeyaos salgan esi día a les cais p'amosar la so refuga a una institución arcaica y dafechu antidemocrática como ye la monarquía.

Amás, Fai! quixo espresar el so despreciu por unos "festexos" y unos galardones dafechu sovencionaos, provincianos y desprestixaos pola so duldosa oxetividá que, de lloñe, convierten a Uviéu y a Asturies en capital del vasallaxe una vegada al añu y, pa ello, sitien a la ciudá y al país al traviés d'una descomanada presencia policial.

Pa finar, Fai! llama a nun escaecer qu'hai 75 años, nesti país, el movimientu obreru axuntóse nun exemplu de maurez y compromisu nun procesu revolucionariu d'escala mundial p'aparar l'avance del fascismu; un fascismu qu'anguaño inda remanez nes instituciones llexitimáu por marcos supuestamente democráticos onde la disidencia ideolóxica ye penada y reprimida xabazmente; un totalitarismu qu'hai que desenmazcarar y al que-y hai que plantar cara güei, equí y agora, con inciatives que seyan quien a dinamizar y treslladar eficazmente esti discursu a una sociedá anestesiao na era de la (des)información.

REPÚBLICA ASTURIANA...¡SOCIALISTA Y SOBERANA!

L'agrupación política d'izquierda soberanista Fai! quier facer pública la so postura énte los actos institucionales y políticos del 8 de setiembre:

1º Asumiendo esta fecha como cualesquier otra fiesta patronal, coles sos correspondientes denotación y connotación. Entendiendo que, poles sos característiques, nun s'alcuentra nésta'l conteníu históricu y políticu propiu d'un día de la nación asturiana a reivindicar polos axentes sociales que creen y s'enfoten nel futuru d'una Asturies autodeterminada, socialmente igualitaria y xusta.

2º Recordando que la única fecha que Fai! reivindica como Día de la Nación Asturiana ye'l 25 de mayu y faciendo un llamáu a zarrar files ente los otros colectivos que tamién tienen manifestao esa opinión.

3º Condergando la cortina de fumu que cada añu emite'l gobiernu asturianu, el del pautu vergoñosu "PSOE IU-BA-LV", cola  so programación festiva, na qu'amás vuelve a demostrar la so ruina competencia en cultura nacional asturiana y una falta de tactu y tastu nel desendolcu d'unes fiestes de supuestu calter asturianu.

4º Llamentando que pa dalgunos colectivos ésti seya un día de fiesta y non de llutu. como manda l'actualidá y el devenir históricu d'Asturies, siempre amenorgada nos sos derechos sociales y nacionales.

5º Proponiendo que les eventuales xuntances o proyectos d'unidá política de la izquierda asturiana, surdíos de l'añal necesidá de semeyes conxuntes, lleguen a consolidase cola mirada puesta n'otres feches más dignes y decisives y a lo llargo d'una axenda d'oxetivos a mediu y llargu plazu que conduza al desenvolvimientu d'una rede política d'autodefensa que Fai! namás atalanta dende postulaos centraos nes organizaciones d'izquierda soberanista, ensin esclusiones, pero tamién ensin cayer en tentaciones rexonalistes y/o interclasistes.

Poro, y en resultes del panorama políticu actual, Fai! quier más facer d'esti 8-S una xornada pa la sobriedá y la reflexón, al empar que llanza un berríu de socorru, un S.O.S., pol 25-M, día de la Nación Asturiana.

Asamblea Xeneral de Fai!

N'Asturies, a 7 de setiembre de 2009

Fai! aprovechó la ocasión pa repartir ente les persones presentes cientos de panfletos con un manifiestu antitaurín y de pegatines nueves col llema "Esto ye Asturies: nin imposición cultural nin tortura animal" que foron acoyíes y demandaes con munchu éxitu ya interés polos asistentes, apegándoles durante'l trayeutu y decorando camisetes y mochiles.

Fai!, sicasí, quier denunciar públicamente l'actitú de los "taurinos", que provocaron en tou momentu a les y los manifestantes con "chulería torera", insultos y, en non pocos casos, con saludos fascistes, énte les miraes d'unes fuerces de "seguridá" que nun ficieron res pero amenazaron, con cascu y en formación, a los convocantes d'un actu llegal como aquel con cargar contra les y los antitaurines/os. Axuntamos un vidiu que preba estos fechos, recoyíu durante la movilización por Mcnolos Prod.

De la mesma manera, dende Fai! queremos siñalar l'actitú de la prensa, muérganu cómpliz na promoción y caltenimientu d'estos "festexos de la vergoña", que s'encargó de mentir y pretender criminalizar al movimientu antitaurín con titulares de fueya entera del tipu "Esta plaza la vamos a quemar", n'alusión a unos supuestos glayíos qu'enxamás nun se dixeren, o llamando a los cuerpos policiales a "detener" (sic) a tolos y toles manifestantes antitaurinos. Capítulu aparte merez el papel bochornosu de la TPA, que non sólo promociona esti eventu con un despliegue de medios y tiempu "informativu" desaxeráu, sinon qu'obvia cualquier tipu de movilización disidente y de protesta escontra estes "corríes de toros", ensin siquiera dar una mínima cobertura a una de les movilizaciones más importantes del branu asturianu.

Pa finar, dende Fai! queremos felicitar a la organización convocante, esperando que los murnios fechos d'esti añu que, nun podemos escaecer, finaron col asesinatu cruel d'animales y la invasión mediática aculturizadora, faigan reflexonar a una clas dirixente acomplexada y se desanicien d'una vegada por toes, declarando Xixón y Asturies como territoriu llibre de crueldá escontra los animales.

ESTO YE ASTURIES
NIN IMPOSICIÓN CULTURAL NIN TORTURA ANIMAL
TOROS D'OSBORNE ¡FUERA!
CORRÍES ¡ILLEGALIZACIÓN!

Si quies que t'apurramos pegatines contauta con nós nel puestín de Fai!.

Manifiestu:

¿Fiesta? -> Non, ¡TORTURA! ¿"nacional"? -> Non, ¡ESPAÑOLISTA Y ACULTURIZANTE!

Los toreros, col so circu mediáticu endolcáu en traxes tan ridículos como rellumantes, lleguen como tolos años al nuesu país. Demientres, los que sovencionen el circu de la vergoña con perres públiques, los provincianos que nos malgobiernen, llántennos nes nueses cais los sos cartelos de tufu ranciu y sádicu.

Por muncho que los torturadores y la so corte de sádicos lo digan, nengún ser vivu naz pa ser maltratáu y martirizáu. Amás, tenemos que tragar y comulgar con qu'esto seya considerao un "arte" y un "bien cultural", en cuenta d'un exemplu cruel del pensamientu egocéntricu humanu. Tampoco podemos escaecer qu'a estos eventos de la crueldá asisten enforma de neños cuando nes lleis estatales ta específicamente prohibío la presencia de menores; daqué, qu'amás, amuesa la violencia d'estos "festexos".

Yá enantes de salir a la plaza de tortures, el güe ye maltratáu y drogáu pa provocá-y un estáu d'ansiedá y nervios que-y xeneren una agresividá que torga les sos facultaes físiques y mentales, saliendo al sable desesperáu y malferíu. Nel mesmu "eventu" siguen faciéndose-y mancadures que-y producen un dolor insoportable y al mutilalu y sacalu de la plaza inda sigui vivu n'agonía. Y nun ye esti l'únicu animal que carez la barbarie de los asesinos. Al caballu tamién se lu obliga a "participar" al traviés de golpes y descargues llétriques nos xenitales pa combatir el "mieu" y l'estrés que-y xenera la "fiesta".

Ésta, y non otra, ye la realidá d'un "festexu" pol que se lleguen a pagar hasta 500€ per persona, ensin cuntar colos precios astronómicos a los que puen llegar los abonos, cola permisividá institucional y organizativa pa coles "reventes" qu'ellos mesmos remanen.

Pero ésti nun ye namás un actu de tortura animal, de sadismu organizáu, NON. Ye una más de les ferramientes al traviés de les cuales se fomenta la imposición cultural españolista a los pueblos del "reinu". Y Asturies, una nación na que'l maltratu animal, y al ganáu vacunu inda más, enxamás fueron permitíes, entendies nin fomentaes, carez la imposición d'unes tradiciones ayenes a esti país. N'Asturies siempre se dió'l llombu a esta triba de "festexos" qu'añu tres d'añu siguen metiéndonos pelos güeyos, como demuestra l'amplísimu dispositivu nos medios públicos asturianos (TPA) y el destín de cientos de miles d'€ públicos pa la "cellebración" d'estes corríes a les qu'acude tola "crème de la crème" de la clas dirixente "asturiana".

Poro, dende Fai!, desiximos la inmediata abolición de les corríes de "toros", la tipificación de la tauromaquia como delitu nel códigu penal y la declaración institucional y plena d'Asturies como país llibre de toa mena de tortura animal y, por descontao, llibre en tolos xacíos. Amás, tamién aprovechamos pa espresar la nuesa vergoña énte'l caltenimientu de les 5 siluetes xigantes d'Osborne nel nuesu paisaxe: un "monumentu" a la tortura animal y al españolismu más ranciu protexíu poles lleis del "reinu d'España".

ESTO YE ASTURIES: CADA VEGADA SOMOS MÁS
NIN TORTURA ANIMAL NIN IMPOSICIÓN CULTURAL
TOROS D'OSBORNE ¡FUERA!
CORRÍES DE TOROS ¡ABOLICIÓN!

http://www.fai-asturies.org/principal.php?pag=lernot&id=89

Dende Fai! queremos agradecer a Agora País Llionés el brinde pa participar na so revista, deseándo-yos lo meyor pa les sos reivindicaciones que tamién facemos nuestres, esperando caltener per munchu tiempu esti bon clima de sintonía ente organizaciones d'esquierda soberanista de dambos llaos del cordal.

¡Puxa Asturies y Llión llibres y socialistes!

Testu de la entrevista:

- ¿Qué ye Fai! - Asturies y cómo surde?

Fai! ye una organización política d'esquierda soberanista, non vinculada a nengún partíu políticu, que tien como finxu articular, dende l'ambetu de los estremaos movimientos sociales, un frente unitariu d'aición y pensamientu na esquierda y la defensa de la soberanía popular asturiana. Surde'l 1u de mayu de 2008 como espaciu alternativu y llugar nel qu'ellaborar y treslladar un discursu concretu a la sociedá d'esti país.

- ¿Cuál son las vuesas principales vindicaciones?

En Fai! creemos qu'otru mundu ye posible. Defendemos una Asturies soberana nun mundu de pueblos llibres. Nós consideramos que namás sedremos verdaderamente llibres, si ponemos fin a la opresión nacional que carez Asturies, al tiempu que desaniciamos esti sistema capitalista, sangrín, que nos afuega social y nacionalmente. Nesti sen, Fai! apuesta por una esquierda soberanista, altermundialista, anticapitalista ya internacionalista, feminista, antirracista y antifascista, ecoloxista, llibre de represión a les dixebraes opciones sexuales y/o afectives y realmente democrática. En resumíes cuentes: que lluche pola consecución del socialismu n'Asturies y defenda les estremaes identidaes nacionales como rempuesta al capitalismu, qu'al traviés de la globalización, mundializa la esplotación y el beneficiu pa unos pocos, en cuenta d'esparder la riqueza, los recursos y los derechos.

- ¿Qué tipu de llabor facedes p'algamalas?

Fai!, nel añu escasu que tamos cumpliendo d'actividá, vien trabayando en manifestaciones, concentraciones, conciertos, un programa biselmanal de radio nel que, por cierto, tuviemos la suerte de cuntar cola  participación d'Agora y d'otros coleutivos d'otres naciones, tamos nel Claustru de la Universidá d'Uviéu, campañes gráfiques de cartelería y pegates, aiciones na cai, charres abiertes, proyeiciones, presencia n'asamblées y plataformes variaes...col enfotu de presentar a los estremaos ambetos de la esquierda asturiana y la sociedá un discursu nacional y de clas propiu, concretu y claru. Asina, Fai! considera prioritaria la unidá d'aición ente la esquierda soberanista asturiana, como manera de llegar de mou más claru y efectivu al pueblu.

- ¿Qué rellaciones tenedes con outros coleutivos asturianos ya internacionales?

Como vos dicíemos, Fai! tien como ún de los sos finxos estratéxicos el trabayar en comuña, y prioritariamente, con otres organizaciones de la esquierda y, n'especial, con coleutivos y xente independiente de la esquierda soberanista asturiana. Poro, Fai! vien participando estos meses en reivindicaciones mui interesantes como les del Ensame República Asturiana, que nos prestaría sorrayar, pa entamar a esparder un
republicanismu asturianu socialista onde nun son protagonistes les siegles sinon el fin común: l'articulación d'esi discursu y el so treslladu a la sociedá.

No que cinca a les rellaciones internacionales, dende Fai! abúltanos imprescindible l'afondar na comunicación, collaboración ya intercambiu de campañes, idées y el trabayu n'oxetivos comunes con otres organizaciones
d'otros pueblos. La xuntura ente pueblos ye la única estratexa de resistencia viable ente l'enemigu común: l'imperialismu que remanez de les grandes potencies mundiales, les instituciones títeres del capital como
OTAN o X.E. y, nun lo escaezamos, tamién d'esti estáu español opresor continuador del franquismu.

- ¿Cómo tán la situación llingüística d'Asturies y las vindicaciones pola oficialidá?

Asturies vive nuna situación predemocrática en munchos xacíos y la murnia situación llingüística ye ún más d'estos focos represivos. Dende'l puntu de vista social, l'asturianismu lleva siendo'l movimientu reivindicativu más potente (y l'únicu que sigui alantre, y cada vegada con más puxu) n'Asturies nes trés décades llargues dende l'entamu de la mal nomada "transición", con un consensu social ampliu pa la so oficialización y les midíes qu'han asegurar la so supervivencia. Sicasí, la situación del idioma cada vegada ye más crítica, con un gobiernu de la "esquierda plural" y una oposición llingüicides y antiasturianes, que reprimen y marxinen a les y los asturfalantes col únicu enfotu de desaniciar esta parte del nuestru patrimoniu cultural.

Pero la rempuesta énte'l so intentu de robanos la llingua tamién ye fuerte y plataformes como'l Conceyu Abiertu pola Oficialidá tan llevando alantre campañes mui importantes y exitoses, como "Doi la cara pola
oficialidá", pa que s'algame la oficialidá de la llingua asturiana (y el gallego-asturianu na so área) na próxima reforma del estatutu asturianu. Tampoco podemos escaecer qu'esta reconocencia nun garantiza, en sigo mesma, un futuru de supervivencia pal idioma, pero ye la situación mínima p'abordar con garantíes esa llucha pola recuperación total del patrimoniu llingüísticu asturianu.

- ¿Cuála ye la situación del asturianismu cultural y políticu?

No tocante al asturianismu cultural abúltanos, que quiciabis seya esta la estaya na que'l movimientu más medró y algamó más éxitos. La producción cultural asturiana n'asturianu y gallego-asturianu abúltanos
que consiguió alquirir, a pesar del nulu interés y sofitu institucional, una calidá bien curiosa y preba d'ello ye l'éxitu y la bayura de grupos musicales de tolos estilos, escritores, poetes y artistes en xeneral qu'usen con normalidá l'idioma propiu.

Pero anque podemos sorrayar dalgún éxitu nesi campu cultural, tolo contrario podemos dicir del campu políticu, onde abúltanos que nos fai más falta que nunca reflexón y autocrítica al rodiu de los oxetivos y
estratexes que vienen emplegándose apocayá. Con too y con ello, ensin ser pesimistes, creemos que n'Asturies tien futuru un espaciu políticu unitariu d'esquierda soberanista y qu'esi llugar común de los que queremos da-y otra traza a esti país pasa por entamar la casa pelos cimientos, per salir a la cai y presentase ensin complexos pero con un mensaxe claru y argumentáu, que llegue a la sociedá y dea solución a los problemes d'Asturies.

- ¿Y del movimientu obreiru?

Agora que la crisis capitalista entama a tocar a les clases más favorecíes (anque llevare décades esplotando y desangrando a millones de persones en tol planeta -y equí tamién, anque munchos miraren pa otru llau-) fáise inda más necesaria la rempuesta organizada. Ye'l momentu d'afondar na xuntura de los y les trabayadores pa defender lo que ye nuestro y espetá-yos bien claro que la crisis nun vamos a pagala nós pa
qu'unos pocos sigan viviendo privilexadamente. N'Asturies yá vienen desendolcándose delles movilizaciones escontra la crisis pa dicir al alto la lleva que yá valió de socializar les deudes y privatizar los beneficios. Y esa ye la llínia a siguir.

Esti 1u de Mayu, de la mano de los sindicatos alternativos, hai qu'entamar una ofensiva pol cambiu total que faiga desapaecer esti sistema que quedó abiertamente demostráu como fracasáu dende l'aniciu, ensin cayer na trampa del reformismu y el poner parches que pa nada valen. Agora ye'l momentu de da-y la vuelta a la situación.

- ¿Qué visión del País Llionés y la súa situación socio-política tenedes?

Abúltanos que dende Asturies, y sobremanera nel ámbitu cultural y políticu del asturianismu, el País Llionés ye visto como una tierra hermana cola que compartimos idioma y permunchos rasgos culturales ya
identitarios comunes. Quiciabis dacuando esa xermandía seya daqué paternalista, pero síguise con muncha atención, esperanza y especial ciñu cualquier movimientu o noticia que se produz nel llionesismu, sobremanera no que cinca a la política llingüística y cultural.

En cuantes a la situación sociopolítica, dende Fai! tamos percontentes/os de ver cómo la xente d'Agora - País Llionés, d'un perfil fundacional y estratéxicu que creemos mui averáu al de la nuesa propia organización, trabaya na reconstrucción nacional y popular de Llión dende la esquierda, dende onde tien que ser. Nesti intre namás queda deseavos el meyor futuru pa la vuesa llucha y davos tolos ánimos y solidariedá que podamos dende l'otru llau del cordal, esos montes que nos xunten, pa que s'algamen los más de los vuesos oxetivos que tamién son los nuesos.

- Espaciu llibre pa contar lo que vos pete.

Más nada, agradecémosvos enforma'l vuesu enfotu y atención pa con nós y el poder participar nesti primer númberu del fancín d'Agora. ¡Que seyan munchos más númberos!

¡PUXA LLIÓN LLIBRE Y SOCIALISTA!
¡PUXA ASTURIES LLIBRE Y SOCIALISTA!

Fai! Xixón fúndase col enfotu de facer un movimientu republicanu asturianista, soberanista, ecoloxista, feminista, antifascista, antirracista y a favor del socialismu, de les llibertaes sexuales y afectives y pol accesu de la mocedá a una vivienda digna, poro, faciendo mientes tamién al movimientu “okupa”, como alternativa a la especulación y los precios de la vivienda.

Dende un entamu empetacámonos a El Muselón y a la Regasificadora, amás de refugar de la corrupción urbanística permitida pol Ayuntamientu llocal, y desiximos que se facilite l'accesu de la mocedá a una vivienda, a un trabayu y sobremanera, a un salariu dignu.

Sofita tamién la idega d'organizar un movimientu d'esquierda soberanista con puxu nel conceyu playu, axuntando a toles espresiones polítiques y sociales que defendemos una República Asturiana pa establecer asina un campu d'aición más resistente que defienda los intereses d'Asturies en Xixón y poro de los de tolos asturianos y asturianes.

Faciendo Xixón, faciendo Asturies, dende xunu de 2009
¡Puxa Fai!
¡Puxa la República Socialista Asturiana!

1.   Refúguense les dinámiques político-económiques y, poro, les electorales, sociales y culturales, propies del modelu de la Europa del capital. La polarización de la riqueza y la perda de derechos, l’esbarrumbe natural -cada vegada más tapecíu- y l’aculturación y el glotocidiu son les coordenaes d’una Europa al debalu pel llibre mercáu, una xuntanza económica encontada n’estaos que reprimen naciones, pueblos y persones. Nesti mesmu sen, refúguense toles candidatures que nun tengan como Norte la llucha esplícita y en tolos frentes contra esta realidá.

2.   Refúguense la llei de partíos y los intentos del españolismu d’illegalizar les idees, criminalizar y censurar candidatures, tamién equí n'Asturies, el mesmu españolismu al que-y presta qu’añeren les opciones fascistes nes cais y nel 7-X.

3.   Refúgase la candidatura d’Esquerra, Chunta, BNG, EA y Aralar, qu’amás de francer el so proyectu orixinal d’una “Europa de los Pueblos”, nun dulda en plantegar una opción socialdemócrata y combayona cola Europa del Capital, qu'amás de dexar n’orsai a Asturies reabre un conflictu vieyu yá ente sectores esencialistes de los nacionalismos gallegu y asturianu.

4.   Llaméntense les candidatures electorales per separtao d’UNA y Andecha Astur, organizaciones toes dos que Fai! tien n'estima pero que marafundien col enfrentamientu irracional d'anguaño la posibilidá de plantegar, nestes eleiciones nes qu'Asturies por sigo mesma nun cuenta, una opción unitaria del soberanismu d'esquierda asturianu onde participen los más de los actores políticos y sociales implicaos. Pola mesma razón, refúgase la participación del Bloque por Asturies en “La Izquierda”, entregando los sos activos al estatalismu decadente y seguidismu del PSOE qu'encarna Izquierda Unida.

5.   Acuéise con interés la candidatura d’Iniciativa Internacionalista – La Solidaridá ente los Pueblos, pescudando que'l de so ye un apueste de resistencia énte la galerna eurocapitalista y españolista, un apueste porque les naciones y les persones, tamién les minorizaes nos sos derechos, cuenten auquiera que seya. Fai! echa en falta la presencia na candidatura de xente representativo d'Asturies pero entiende qu'esti espaciu podría llegar a ser válidu como sitiu pa la reflexón y l'alcuentru de les esquierdes soberanistes, entamando pel nuesu país, pa coordinase nacional ya internacionalmente más alló de les propies dinámiques electorales, siempre que seya esti un espaciu d'alderique, suma y acumulación de fuercies llibre de crítiques destructives o desmovilizadores.

Asamblea Xeneral de Fai!

POETES AGRESIVOS

(disparen les sos obres contra los que se duermen)

La I Folixa Nacional "Asturies enxamás vencida" presenta l'alcuentru lliterariu "Poetes agresivos (disparen les sos obres contra los que se duermen)", un foru onde cuatro poetes de les lletres asturianes van presentar parte de les sos obres. Creaciones que comparten un momentu y un llugar nel mundu, y que de xuru van dar espaciu pa la reflexón poética y social fecha n'Asturies. Una oportunidá pa la interconexón de sensibilidaes que, cola poesía como arma, disparen intimismu, violencia o ironía contra una socieda anestesiada.

Xandru Fernández ye una de les voces más rescamplantes de la lliteratura asturiana, igual en narrativa qu'en poesía. De la so collecha más postrera destaquen "Servidume", que-y valiera'l premiu Xuan María Acebal en 2000 y "Les vides incompletes", llibru col que repetía premiu la seronda pasada, franciendo bien francíu un silenciu poéticu d'ocho años.

Sergio Gutiérrez Camblor asoleyó'l poemariu "A dixo a B: perversu" cola editorial Trabe y tien ganaos los premios de poesía Constantino Cabal y Elvira Castañón. Amás participó na organización de la Entamada07, un solmenón poéticu con epicentru en Siero.

Xabel Vegas, músicu conocíu pola so trayectoria mesmo en solitariu que col grupu Manta Ray, tien en "Pupiles d'Alfiler" el so campu base pa la creación lliteraria. Esti poemariu electrónicu ye la meyor opción pa lleer parte de la so última creación en forma de poemes y videopoemes.

Carlos Suari acaba de publicar "Orbayu d'alfileres", un volume onde selecciona tola so poesía que nun punxera en papel. Amás de coescribir "Treslallende" va un par d'años, nel cibernéticu "El mio cachu tírolu" yá xuntara dalgunos poemes qu'agora resurden.

Estos "Poetes agresivos" van disparar les sos obres contra los que se duerman, dende les cinco y media la tarde d'esti sábadu 23 nel CSOA La Reflexón de Xixón, dientro del programa de la primer Folixa Nacional "Asturies enxamás vencida" entamada por Fai! y ques’allargará con un mural reivindicativu y un conciertu tola tarde-nueche, a cargu de los grupos asturianos Gomeru, K-Nalón, Arma X, 13 palabras y Vinagre de Sidra.

¡Que vos presten!

[*+ ]

Amás, otres noticies d'actualidá y más música.

[*+ ]